Vawiin hian Silsuri South-ah MNF Block Meet an hmang a, khaw 7 aṭanga an hruaitu kalkhawmte hi mi 1000 vel zet an ni. Silsuri-ah hian Congress leh ZPM engemaw zat MNF-ah lawmluh an ni nghal bawk. Heng hmunah te hian Dr. R. Lalthangliana chuan Pu Rintluanga Sailo hma lo lak tawh leh hnathawh kal mekte chu thlan tlin a nih chuan chhunzawm zel a tum thu a sawi.

Silsuri pawh School tihchangtlun zel an mamawhna a hriat thu sawiin, Dr. Thangtea chuan, "Higher Secondary School neih in phu ve tawh hle a, In 1000 chuang in ni ve tawh; thlan tlin ka nih chuan theihtawpin hma ka la ang. Field tihphuisui leh ṭhalaite infiamna tur ṭha zawk Dampa bial chhung khaw hrang hrangah hian in mamawh hle tih ka hmu a, chu bakah ṭhalaite eizawnna tur kawng hrang hrangah thlan tlin ka nih chuan theihtawpin hma ka la ang," a ti.

Dr. Thangtea chuan heng lai vela inkalpawhna kawngchhe lutuk te hi siamṭhat ngei ngei a ṭul thu a sawi a. Border Trade lama a hma a lo lak tawhte sawi bawkin, "Bangladesh Commerce Minister-te nên Helicopter-a kalin, he lai hmun Silsuri-ah hian kan en dun tawh a, Official-a tihfel thawkhat tawh, Bangladesh sorkar tlûk tak vanga buai ta kha thlan tlin ka nih chuan ka umzui zel ang," a ti bawk.

Hmunphiah hralhna tur awm mumal lo leh a man tlawm lutuk chu pawi a tih thu a sawi a. Electric chhit man to ta lutuk eng ṭha bawk silote hi a tuartu chu mi retheite bawk an nih thu sawiin, buhfai man a let thawka to te nen MNF sorkar hunah ennawn leh an tum thu a sawi bawk.

Vawiin chawhnu hian Dr. R. Lalthangliana leh amah ṭawiawmtute hian Lawngin Marpara lam an pan leh nghal a ni.